长洲都有得露营？8个必到西园的理由！

作为一个露营友，一直都憧景可以喺香港每个地方Camp下打下卡，不过有好多地方除咗冒险偷露就冇办法。今次就为大家介绍一个位于长洲西面嘅营地，园区占地40万尺，除咗有大大大大草地做卖点外之外，睇下其他8个必到西园嘅理由！

01｜长洲搅搅新意思

对好多人嚟讲，去长洲来来去去都系张保仔洞、东湾同饮饮食食，可能一年去两次已经好够皮。位于长洲嘅西园就比咗一个好大嘅理由比大家，成40万尺地方已经够大家玩足几日，主打历奇冒险更加吸引各位好动一族入场。

西园位于长洲西面，占地40万尺

02｜享受舒适露营环境

唔理你系资深露营友定系初心者，有时去到啲热门营地 (其实冷门营地都会) 比啲密集到令人恐惧嘅营吓到想走人，再加上成日都见嘅冇公德行为，只可以讲句：其实我都系想静静地Camp下啫…

西园嘅出现为长洲带嚟一个优质露营地点，你可以选择Camping / Glamping唔同玩法，「印第安营」、「南非营」、「蒙古包」同埋大受欢迎嘅「观星圆拱屋」，部份仲设有水冷空调添！啱哂夏天都仲想露嘅各位。

最受营友欢迎的「观星圆拱屋」

名副其实的蒙古包

营帐之内设备齐全，部份更设有水冷空调

03｜亲亲山羊

可能因为山羊唔多怕人又冇乜攻击性，所以大人细路人都钟意同羊近距离接触，西园唔只有羊，更加系用放养方式定时放牧，有时仲可以见识到佢地攀石嘅技术添！

与羊一起露营，是难得的经验

04｜挑战自己‧安全历奇

上面都有讲过，西园可以够大家玩足三日两夜，当然唔系叫你Hea喺个营咁颓啦，最吸引小弟嘅系佢有唔少历奇活动，仲相当有挑战性。好似呢个巨人梯咁，睇住呢对情侣参加者嗰种互相支持互相体谅又冇交嗌，最后成功登顶真系不得不讲句好葡萄；另外睇外国行树顶走廊见得多，原来呢度都有得玩！当然全部历奇活动都有合资格教练从旁指导，自然玩得安全又放心。

二人合作登上梯顶，讲求合作及胆量

设于真树上的树顶走廊，是香港独有

05｜大人细路个个啱玩

咪以为历奇活动要十岁以上先玩得，小朋友嚟到其实仲有大把嘢玩，遥控船当然个个争住玩啦；想培养佢地嘅节奏感？由非洲鼓手带领嘅非洲击鼓活动就更加唔可以错过，气氛绝对系一流。

非洲击鼓活动，大人小朋友一样投入

遥控船是小朋友必玩之选

06｜鱼菜共生生态教育

除咗玩玩玩成日挂住玩，其实西园仲肩负起推广生态教育嘅使命，如果想认识有机耕种、循环不息鱼菜共生、以及各种可能已经被淡忘嘅农耕知识，喺西园都有专人向你讲解，又或者亲身参与都得！

鱼菜共生源自唐朝，是一项巧妙的前人智慧 (除了鱼，原来池塘内也有龟！)

07｜历史文物「一号界石」就在西园

话说殖民政府于1919年喺长洲竖立起十五支界石，用嚟划开白人同本地华人嘅居住局域。而多年来遍寻不获嘅一号界石，终于喺2015年西园复修建设为生态历奇乐园时比人发现，行山朋友Kill标高柱甚至标距柱之余一定要Kill埋界石。

一度消失的No.1长洲界石，见证时代变迁

08｜海景处处

平日返工返学捱到肺痨，系放假先可以去露下营，拣地点除咗大草地，最好梗系有埋海景啦。又讲返西园呢40万尺地方，唔计未入园先经过嘅西湾码头提供嘅小岛休闲Feel，西园仲紧贴住白鰽湾同鯆鱼湾，呢一刻我最担心嘅系太多嘢玩唔够时间放空望海。

部份营区邻近海边，睇一望无际日落十分方便！

留意返如果冇时间去两日，但又想入园行下都可以买张入场劵($48)入去影下相，不过部份活动均须按价目表收费，如果想玩其他活动最好就早啲Book定啦！

嚟紧佛诞不妨入长洲睇完太平清醮飘色巡游，再入西园瞓返晚，翌日一起身就可以开始历奇冒险之旅！ 

• 前往方法 (步行 / 单车)：长洲码头往右边直路沿海傍往西湾方向走至尽头，左转上「赞端路」。步行约20分钟、单车约5分钟。
• 前往方法 (街渡)：长洲码头右旁之公众码头，乘坐「华胜街渡」至「西湾码头 ∕ 张保仔洞」(费用约HKD 10元)，由西湾码头左接「赞端路」。(船程约 5 分钟，另加步行约 4 分钟)